Korleis bli dumpa på 10 dagar..

..eller 10 måtar å kvitte seg med ein potensiell mann

Du hugsar kanskje filmen "How to Lose a Guy in 10 Days"?
Kate Hudson, eller Andie som ho heiter i filmen, gjer alt ho kan for å bli dumpa av Benjamin, spelt av Matthew McConaughey. Eg skal ikkje minne deg på handlinga - du kan sikkert finne den på Viaplay eller Netflix om du treng ei oppfrisking. Poenget er at same kor ille ho oppfører seg, klarar ho ikkje å riste han av seg.

 

Berre gløym denne romantiske vranglæra. I røynda verkar det nemleg ikkje slik. Ikkje at eg nokonsinne har fått erfare dette, men eg har ein del veninner som har har opplevd at menn flyktar frå dei før dei dei får sukk for seg. Så dersom målet er å bli dumpa på kortast mogleg tid, følgjer her ei tipunkts liste med garantert effekt:

 

1. Nemn ditt sterke ønske om (fleire) barn på første date, eller så tidleg som mogleg. Namngi dei gjerne òg. Berre ein liten advarsel: Forsikre deg om at han ikkje er interessert i barn på førehand, om ikkje kan dette slå heilt feil ut..
2. Gi opp alle eigne interesser. Gjerne òg vener og familie.
3. Rott deg saman med mor hans, og oppfør deg like overbeskyttande som ho. 
4. Gjer alt for han. Lag mat, vask kleda hans, kjør han til trening, hent han etter trening, kjøp nye klede til han, gjer alle ærend for han. Du trudde kanskje dette ville halde på ein kjærast. Neida, om du ofrar alt, vert han lat, utakksam og sist men ikkje minst: full av forakt mot deg.
5. Insister på å vere med når han skal drikke øl med kompisane. Særleg om det ikkje er andre jenter der. Eventuelt kan du tilfeldigvis dukke opp på stampuben og overraske han.
6. Ta samtalen på andre date. Altså Samtalen med med stor S, ikkje ein heilt vanleg prat - nei, spør om han ser for seg ei framtid med deg. Kortid de skal gifte dykk, kor de skal bu og kor mange barn de skal ha er naturlege krydder i salaten, orsak: Samtalen.
7. Bemerk kor dumme, tjukke og stygge alle damer rundt dykk er. Inkludert venninnene hans.
8. Snakk støtt om kor dum, tjukk og stygg du kjenner deg. Gjerne kvar gong de har det travelt og du ikkje finn noko å ha på deg.
9. Ombestem deg alltid når du har bestilt mat på restaurant. Når kelnaren kjem, seier du at du ikkje fekk lov til å ete så feitande mat - samtidig som du nikkar diskret mot daten din. 
10. Ikkje ha sex på første date. Orsak - HA sex på første date. Og fell nokre tårer av glede fordi du aldri har opplevd noko så vakkert.

Dersom han ikkje er borte no, har han anten inngått eit veddemål med kompisane eller han er rett og slett veldig, veldig forelska..

 

 

God jul frå frøken perfekt!

I år var planen å gå ned ti kilo før julaftan, gå på julebord i den flottaste kjolen eg nokonsinne har eigd, lage og sende julekort til familie, venner og bekjente, arrangere juleverkstad, kjøpe velovervegde gåver som alle i familien set pris på, kose med julemusikk og interiørblad, og pakke inn gåver medan snøen dryssa stille utanfor vindauga i min lekre julepynta heim. Omlag som dette.
 

I staden har eg lagt på meg fem av dei sju kiloa eg tok av i vår og sommar, ikkje funne ein einaste kjole som er meir flatterande enn joggebuksa eg planlegg å tilbringe mesteparten av romjula i, laga eit par julekort som eg ikkje har sendt, forsøkt meg på juleverkstad for meg sjølv (utan eit einaste ferdig produkt anna enn samanklistra fingrar og glitter på golvet), ikkje høyrt ei einaste låt på julespelelista mi - og manglar halvparten av julegåvene. Men framleis er det jo fire dagar før Tre Nøtter til Askepott og pinnekjøt.

Tenkjer eg tar meg ein velfortent pause for ein øl på Ferdinand

Det glamorøse singelliv

Er du òg singel? Vaknar du kvar morgon i himmelsenga, før du strekkjer deg som ein katt i silkelakenet og står opp til ein ny frisk morgon med raw food og yoga, oppdaterer bloggen og går på jobb? Som suksessfull advokat i eit anerkjend firma, der du er den yngste partnaren nokon sinne?
Ikkje?

Nei, ikkje eg heller.

Men innimellom slår singellivet til med sine glamorøse øyeblikk: Som når du på veg til venninnekveld blir sjekka opp av ein student på ca 22. Sjølv om inntaket av flytande stimuli er nokså merkbart, kan du ikkje heilt unngå å verte smigra av at ein kjekk ung mann kallar deg søt - og det trass i at du var ferdig med ungdomsskulen då han vart fødd. Eller når du får sms frå selgjaren hos Canal Digital etter eit sjarmerande avslag på ei ny kanalpakke.

Men dette er nok meir unntaka.

Normalen er å vakne ein heilt vanleg søndag, litt småtørst og groggy etter ein kveld på byen. Aleine, i ein kald leilighet med tomt kjøleskap. Gjerne med eit par mindre flatterande bilete på mobilen - i form av "gruppe-selfies" og andre kvalitetsmotiv frå stampuben. Sjekkar utboksen på sms og Facebook: Puuhh - tom! Eller sletta du alt før du la deg til å sove? Med kjole og sminke på?

Då er trøysten at ein kan ha det akkurat så ryddig som ein vil. Eller rotete. Og den lilla sofaen, putane med paljettar, kattungar eller hovudskallemotiv treng ikkje godkjenning før dei kjem inn i stova. Du kan ete sjokolade før middag utan at nokon bryr seg. Du kan leve på havgregryn i ein månad for å spare til nye ski, sko eller ferieturar. Om kleda dine er for frekke, søte eller alternative er det ingen som rynkar på nasen før du går ut av huset. Og du kan sjå alle dei klissete filmane du vil utan protestar. Eller fotball - utan å krangle om kva kamp ein skal sjå.

Det gjer det kanskje litt lettare å leve med saknet etter å vakne på golvet fordi mannen din har breia seg i heile senga. Eller skjeggstubbar i vasken og på badegolvet. For ikkje å snakke om dei fem ekstra kiloa rundt magen etter at fredagskino med venninner er bytta ut med fredagstaco og film heime.

God singelsøndag!

Det kriblar

Det er vår, snart sommar. Det kriblar i kroppen. Den velkjende kjensla kjem tilbake kvart år, like sikkert som at knoppane sprett på trea, og breier seg frå topp til tå.
Forelska, seier du? Nei, dessverre. Våryr? Langt i frå. Det er noko anna som gjev meg denne altoppslukande kjensla. Nokre mikroskopiske kunstferdige figurar er opphavet: Pollen.
Velkommen vår, farvel uteliv.

Biletkjelde: The Naked Scientists

Sjølvhjelp og oliven

Sjølvhjelpsdronninga. Der har du meg. Ikkje fordi eg har kontroll på alt, snarare tvert om. Eg sluker det meste som er å lese innan feltet sjølvhjelp, og mellom titlane i bokhylla mi (eller akkurat no i ei eske i ei bod hjå eks-sambuaren min) finn ein både "Hemmeligheter for kvinner", "Lykkeformelen", "Tankekuren" og "Hvordan rekke alt og likevel få tid til deg selv". I tillegg står eg på ymse mailinglister, og eg har lasta ned både  "Catch Him and Keep Him" og "Have The Relationship You Want".  Og sjølvsagt prøvd lydspor med Mindfulness, medan eg stadig såg på klokka for å sjekke kor lang tid eg hadde brukt.

Håpet har alltid vore at eg plutseleg skal vakne opp og vere perfekt. Tynn (no modifisert til mindre feit), veltrent, trendy. Karriere som stadig utviklar seg. Til det betre, sjølvsagt. I ei seng med silkelaken, i draumehuset og med ein fantastisk mann ved mi side.
Rart at det enno ikkje har vorte slik, med tanke på all den informasjon eg har slukt rå og deretter drøvtygd.

Men eg har no plukka opp eit og anna tips. Nokre råd er enkle, andre litt verre. Og sjølvsagt er det noko i det at ein må elske seg sjølv før andre kan elske ein, og at det er korleis ein tar ting som gjer heile skilnaden. Men koreis GJER ein det?

Her er mi liste:

1. Start med å godta deg sjølv. Du treng ikkje elske deg sjølv eller seie kor fantastisk du er til spegelbiletet. Som den erfarne menneskekjennaren du er, ser du fort om du lyg..

2. Gå gradvis over til å like deg sjølv. Som med kaffi, øl, raudvin, mørk sjokolade eller oliven; du likte vel ikkje det første gongen du prøvde heller? Sjå på deg sjølv som noko sofistikert som treng litt modningstid før du likar. Og kanskje til slutt elskar.

3. Det kanskje aller mest effektive tipset, og ikkje minst det aller enklaste, har eg lært av å sjå på flyvertinnene under tryggleiksinformasjonen. Og nei, det er ikkje platinablondt hår, raud leppestift og påmåla brunfarge, sjølv om desse triksa nok òg kan kome til nytte. Det er ei nokså enkel frase, fritt omsett gjennom sjølvhjelpsfilteret: Hjelp deg sjølv, før du kan hjelpe andre. Eller sagt litt tydlegare; for å vere noko for andre, må ein først ha det bra med seg sjølv.

4. Du kan eventuelt gløyme alt du har lest, vere deg sjølv, og slutte å samanlikne deg med naboen, kollegaen og barndomsvenninna. Kanskje du då finn ut kva som fungerer for deg. Om du i tillegg aksepterer at dei rundt deg er som dei er, kan det til og med hende du får nye vener. Det er kanskje det rimelegaste, men dårleg nytt for sjølvhjelpsindustrien.

5. Om du framleis gidd å lese dette, og ventar på noko revolusjonerande, seier eg som Frode Øverli i Pondus: "Ta deg en bolle!"

Kjelder:
-Ymse dameblad gjennom mine 19 vaksne år (rekna frå 18 årsdagen, ja). 17 av desse åra vart levd som singel, så eg har rukke over ein del.
- Hemmeligheter for kvinner og ... av ...
- Rori Raye og Christian Carter sine nettsider.
- Mennene rundt meg. Både dei 
- "Syklubben".
- Tryggleiksdemonstrasjonen ombord på fly

Eg er glad

eg var nokså anonym i ungdomen. At eg aldri var mellom dei kule eller pene. Fallhøgda vert mindre då. Bitter seier du? Nei, tvert om. Stundom, når eg treff på dei kule frå ungdomsskulen, vidaregåande eller til og med frå studietida (den var jo ferdig i fjor) slår det meg: Dei har vorte så allminnelege. Både i utsjånad, framferd og levesett. Meir like meg. Dermed er eg nestan kul og fresh - eg har ikkje forandra meg mykje, er framleis ganske anonym, men står litt meir fram i forsamlingar. Tør å vere meg sjølv. Og sjølv om eg aldri vart noko svane, har mine år som den stygge andungen har lært meg å respektere ulike måtar å vere på. Håpar eg.

Det vart med tanken

I dag hadde eg tenkt å skrive eit inspirerande blogginnlegg, morosamt, spissfindig og likevel til ettertanke. Humoristisk og tankevekkjande på same tid. Noko som gjev meining.
Det vart med tanken. Det same gjeld ryddinga av husværet. Det vart med tanken. Det er mykje ein drøymer om, skal gjere ein gong som berre sklir ut i ingenting.
Eg har nett lese eit minneord til Aleksander Dale Oen. Han lot det ikkje verte med tanken. Han gjorde noko. Han brydde seg ikkje om små hinder på vegen, og sa ikkje "eg skal berre" eller "eg kunne vorte ein god symjar, om ikkje.."

Mykje vert med tanken, og slik vil det nok alltid vere. Men alle kan me gjere litt meir av det me har lyst til medan me kan, ikkje klamre oss fullt så mykje til jantelov, men heller realisere fleire draumar og seie oftare at me bryr oss. Leve meir.

Eg hadde tenkt å vere morosam og spissfindig. Men i dag vart det andre ting som trengde seg på.